Shkolla Fillore “Ismail Qemali” – Çair dhe Shkolla Fillore “Halil Alidema” – Pozharan, Viti, kanë nënshkruar një Memorandum Bashkëpunimi, me qëllim forcimin e marrëdhënieve institucionale dhe avancimin e proceseve arsimore .
Memorandumi u nënshkrua nga drejtoreshat e dy shkollave, znj. Teuta Imeri dhe znj. Drita Pira , duke shprehur vullnetin dhe përkushtimin për një bashkëpunim të qëndrueshëm dhe afatgjatë .
Gjatë takimit , biseda ndërmjet dy drejtoreshave dhe kolektiveve përkatëse ishte tejet e dobishme dhe konstruktive , në një frymë bashkëpunimi të ngrohtë dhe profesional . U diskutuan ide dhe iniciativa për realizimin e projekteve të përbashkëta , shkëmbimin e përvojave pedagogjike, aktivitete edukative e kulturore, si dhe zhvillimin profesional të mësimdhënësve dhe nxënësve.
Në këtë takim morën pjesë edhe znj. Mjellma Gashi, përgjegjëse për arsim në Komunën e Çairit, si dhe znj. Elvisa Alidema, këshilltare për karrierë – Pozharan, të cilat kontribuan me ide dhe përvoja të vlefshme në pasurimin e diskutimeve dhe forcimin e bashkëpunimit ndërinstitucional.
Ky memorandum shënon një hap të rëndësishëm drejt krijimit të partneriteteve të reja dhe kontribuon në përmirësimin e cilësisë së arsimit dhe bashkëpunimit ndërshkollor.
